60 Johr Laienspölschor van "Vörut" Henny Tiedemann is van Anfang an derbi
Wenn sück an 23. un 24. Februar de Vörhang in dat Landhus Sylvester öppnet, spölt de Laienspölschor in hör Jubiläumsjohr dat Stück "Dree Frolü hau`n up`n Putz - ole", wat Günther Drewes in dat Plattdütsche öwerstett´t hett. Ton ersten Mal erwähnt wur een Theater un Danzabend in dat Protokollbook van Vörut. An 10.11.1956 keem dat to disse Abend in "Erholung" bi Hinni Ippen, de sien Huskapell domals nah dat Theaterstück ton Danz upspööl. Van Hinni Ippen wurde Bühnenünnerbo to Verfögung stellt un de Vereen muss sück um de Vörhang un dat Bühnenbild kümmern. 20 Mark hebbt de Theaterspölers mitnanner kregen un de Mitspölers harrn ok domals all free Inträh.
De nächst Theaterabend weer denn all in Februar 1958 un siet disse Tied wurd van Vörut immer an de letzte Saterdag in Februar to dat Dörpfest inladen.
Utsöcht wurn de Theaterstücken in de erst Johren immer van de Vörsitter Johannes Dasenbroock, de ok de Leitung van de Theatergrupp öwernehm.
In de Vörstandssitzung an 29.03.1958 wur fastlergt, dat sück interessert Theaterspölers ut Dörp bi de Vörstand melden kunn`n un denn de Festutschuss de Utwahl vörnehmen kunn.
1961 wurrn de Kösten för de Theaterböker mit 43,00 Mark ansett un för de Generalprof een Betrag van 40 Mark für de Laienspölers to Verfögung stellt.
Neben de Vörstellungen bi "Erholung" un jetzt in dat Landhus Sylvester hett de Laienspölschor ok mennig Saterdag up dat Erntefest in Osateraccum spölt. Bi de 850 Johr Fier vant Kark un ok bi anner Gelegenheit ( ton Bispill bi de Boßelers van Neegaud ) wurn Sketche upföhrt. In de Johreshauptversammlung an 16.04.1987 wur de kassenmäßige Trennung van de Theatergrupp vant Vereen beschlaten. Siet 1997 spölt de Laienspölschor in de Theodor-Thomas-Hall Esens. Ok in dat Jubiläumsjohr is an Saterdag, de 10. Märt af 20.00 Ühr wer een Upföhrung plant. Korten dorför gift dat int Vörverkoop bi Helene Janzen un restliche Korten an de Abendkass af 19.00 Ühr.
Ok de Geselligkeit kummt bi de Laienspölers nich to kört. So wur dat Ohnsorg-Theater in Hambörg besöcht un verscheeden Stücken van anner plattdütsch Bühnen ankeken. Bi gemeensame Fiern gift dat denn faken HKT ( Hermanns-Kampf-Tropfen).